Десничарите вршат притисок врз „Виножито“
10 декември, 2003
 |
Извор: А1 Телевизија
Политичкиот секретаријат на организацијата на Македонците во Грција, Виножито, објави декларација во која тврди дека таа е подложена на
притисок од страна на крајнодесничарските елементи во земјата, пишува денеска грчкиот весник „Авги“.
Во декларацијата, додава весникот, како конкретен пример за овој притисок се посочува начинот на кој Виножито била принудена да го одложи
својот конгрес, закажан за 30 ноември, за кој веќе била закупена сала во хотелот „Ксенија“ во град Воден.
Како што јавува дописникот на МИА од Атина, весникот истакнува дека неколку дена пред одржувањето на конгресот непознати лица нанеле
материјална штета врз зградата, во која била сместена салата, што довело до негово одложување.
Градоначалникот на Воден по овој настан предложил конгресот да се одржи на 7 декември во друга сала, сопственост на културното здружение
„Александар Велики“.
Во декларацијата се наведува дека Виножито добивала закани од организациите Грчки фронт и Златна зора, кои ја предупредиле дека ќе се
појават на конгресот со цел да го спречат неговото одржување.
Крајнодесничарските групации се заканиле дека ќе извршат напади во Воденсо цел да го спречат одржувањето на конгресот.
Истовремено во Воден се појавиле летоци со расистичка и неонацистичка содржина, а група непознати лица му се заканувале на раководството
на здружението Александар Велики, по што салата била откажана.
Нели Маес, заменик-претседателот на Европската слободна алијанса, која е застапена во Европскиот парламент, на 3 декември испрати писмо до
грчкиот премиер Костас Симитис во кое бара од неговата Влада да преземе соодветни мерки во врска со случајот со Виножито.
„Ниту еден претставник на локалните власти сепак не презеде никакви мерки со кои би се овозможило нормално одржување на конгресот“, се
вели во декларацијата на Виножито.
„Сето ова се случува во пресрет на 2004 година во Грција, која е можеби единствената европска држава, во која неонацизмот е законска
политичка определба, а расизмот, антисемитизмот, ксенофобијата и дискриминацијата кон малцинските групи се секојдневна појава, како на
социјално, така и на политичко ниво“, нагласува организацијата на Македонците во Грција во декларацијата, што ја објавува „Авги“.
|
|
|
|
